மாம்பழம் லஸ்ஸி செய்வது எப்படி?

பொதுவாக கோடை காலம் வந்து விட்டால் உடல் சூட்டை தணிக்க பலர் பழச்சாறுகளை விரும்பி அருந்துவார்கள். அதன்படி, கோடை காலத்தில் சாலையோரங்களில் ஆங்காங்கே புதிய பழச்சாறுகள் விற்கும் கடைகளைக் காணலாம்.

அந்த அளவுக்கு கோடைக்காலம் வந்தால் பழச்சாறுகளுக்கு மவுசு தானாகக் கூடி விடும். கொளுத்தும் வெயிலில் பழச்சாறு பருகும் இன்பம் தனிதான். எனவே நாம் இன்று காண இருப்பது மாம்பழ லஸ்ஸி.

பொதுவாக லஸ்ஸிக்கான வரவேற்பு விதிவிலக்கானது. லஸ்ஸியுடன் பழச்சாறு சேர்த்தால் அதன் சுவை இரட்டிப்பாகும். மாம்பழ லஸ்ஸியின் சிறப்பு என்னவென்றால், கண் இமைக்கும் நேரத்தில் செய்வது மிகவும் எளிதானது. அதுமட்டுமல்லாமல் கோடைக்காலத்தில்தான் சுவைக்க முடியும்.

ஏனென்றால் மற்ற பருவங்களில் நல்ல சுவையுள்ள மாம்பழங்கள் விளைவதில்லை. எனவே மாம்பழ லஸ்ஸி கோடை காலத்தில் மட்டுமே கிடைக்கும். மாம்பழம் மற்றும் பால் சேர்த்து செய்வதால் உடலுக்கும் மிகவும் நல்லது.

தேவையான பொருட்கள்

1 மாம்பழம்

1 கப் தயிர்

½ கப் பால்

½ மேஜைக்கரண்டி ஏலக்காய் தூள்

1 மேஜைக்கரண்டி பாதாம்

1 மேஜைக்கரண்டி பிஸ்தா

½ மேஜைக்கரண்டி குங்கும பூ

தேவையான அளவு சர்க்கரை

தேவையான அளவு ஐஸ் க்யூப்ஸ்

செய்முறை

முதலில் மாம்பழம், பாதாம், மற்றும் பிஸ்தாவை சிறு சிறு துண்டுகளாக நறுக்கி, மற்றும் ஏலக்காயை தூள் செய்து எடுத்து வைத்து கொள்ளவும்.

அடுத்து ஒரு பாத்திரத்தை மிதமான சூட்டில் அடுப்பில் வைத்து அதில் அரை லிட்டர் அளவு பாலை ஊற்றி அதை நன்கு காய்ச்சி பின்பு அடுப்பை அணைத்து விட்டு அதை சிறிது நேரம் ஆற விடவும்.

பிறகு நாம் நறுக்கி வைத்திருக்கும் மாம்பழத்தை எடுத்து அதை ஒரு மிக்ஸி ஜாரில் போட்டு அதனுடன் 4 லிருந்து 6 மேஜைக்கரண்டி அளவு தண்ணீர் ஊற்றி ஒரு சுற்று சுற்றி கொள்ளவும்.

பின்னர் அதில் ஒரு கப் அளவு தயிரை ஊற்றி அதை நன்கு அரைத்து கொள்ளவும்.

பின்பு அதில் நாம் காய்ச்சி ஆற வைத்திருக்கும் பால், அவரவர் விருப்பத்திற்கேற்ப சர்க்கரை, மற்றும் நாம் தூள் செய்து வைத்திருக்கும் ஏலக்காய் தூளிலிருந்து சுமார் அரை மேஜைக்கரண்டி அளவு சேர்த்து அதை நன்கு அரைத்து கொள்ளவும்.

லஸ்ஸி கெட்டியாக இருந்தால் அதில் சிறிதளவு பால் அல்லது தண்ணீர் சேர்த்து அதை மீண்டும் அரைத்து கொள்ளவும்.

அடுத்து ஒரு கிளாஸ் டம்ப்ளரை எடுத்து அதில் அவரவருக்கு விருப்பமான அளவு ஐஸ் க்யூப்ஸ்ஸை போட்டு பின்பு நாம் அரைத்த லஸ்ஸியை அதில் ஊற்றவும்.

பிறகு அதன் மேலே நாம் நறுக்கி வைத்திருக்கும் பிஸ்தா, பாதாம், மற்றும் குங்குமப்பூவை தூவி அதை சில்லென்று பரிமாறவும்.

இப்பொழுது உங்கள் அருமையான சில்லென்று இருக்கும் மாம்பழம் லஸ்ஸி தயார். இதை கட்டாயம் உங்கள் வீட்டில் செய்து பார்த்து உங்கள் குடும்பத்தாருடன் சேர்ந்து பருகி மகிழுங்கள்.