ரோஸ் மில்க் செய்வது எப்படி?

கோடை வெயிலில் குளிர்ந்த ஜூஸ் பருகுவது அனைவருக்கும் பிடிக்கும். ஆனால் அதே ஜூஸ்களை தொடர்ந்து குடித்தால், நமக்கு அலுப்பு ஏற்படுவது சகஜம். எனவே இன்று நாம் இங்கு காண இருப்பது வித்தியாசமான ஆனால் மிக அற்புதமான ரோஸ் மில்க்.

பொதுவாக கோடைக்காலத்தில் சர்பத்துக்கென்று தனி மவுசு தான் இருக்கும். சர்பத் 11 ஆம் நூற்றாண்டின் முற்பகுதியில் பெர்சியாவில் தோன்றியதாகக் கூறப்படுகிறது, மேலும் 16 ஆம் நூற்றாண்டில் இந்தியாவின் முகலாய படையெடுப்பின் போது மன்னர் பாபரால் இந்தியாவில் பிரபலப்படுத்தப்பட்டது என கூறிகிறார்கள்.

இன்று சர்பத் ஈரான், துருக்கி, போஸ்னியா, ஆப்கானிஸ்தான், பாகிஸ்தான் மற்றும் இலங்கையில் பிரபலமான குளிர்பானமாக உள்ளது. சர்பத்துகளில் பல வகைகள் உள்ளன. இது நாடுகளின் பாணிக்கு ஏற்ப பல வேறுபாடுகளுடன் வெவ்வேறு நாடுகளைச் சேர்ந்தவர்களால் விரும்பப்படுகிறது.

தேவையான பொருட்கள்

1 லிட்டர் பால்

3 மேஜைக்கரண்டி சப்ஜா விதைகள்

வெள்ளரி விதை 2 மேஜைக்கரண்டி

முந்திரி 2 மேஜைக்கரண்டி

பாதாம் 2 மேஜைக்கரண்டி

3 மேஜைக்கரண்டி பிஸ்தா

1 மேஜைக்கரண்டி பால் பவுடர்

1 சிட்டிகை ஒரு சிட்டிகை ஏலக்காய் தூள்

தேவையான அளவு ரோஸ் சிரப்

தேவையான அளவு சர்க்கரை

செய்முறை

ரோஸ் மில்க் செய்வது எப்படி:

முதலில் சப்ஜா விதைகளை சுமார் 20 லிருந்து 30 நிமிடம் வரை ஊற வைக்கவும். பின்பு பாதாம், பிஸ்தா, மற்றும் முந்திரியை சிறு சிறு துண்டுகளாக நறுக்கி வைத்து கொள்ளவும்.

அடுத்து ஒரு மிக்ஸி ஜாரை எடுத்து அதில் முந்திரி, பால் பவுடர், மற்றும் அவரவர் விருப்பத்திற்கு ஏற்ப சர்க்கரையை சேர்த்து அதை நன்கு அரைத்து எடுத்து வைத்து கொள்ளவும்.

இப்பொழுது ஒரு பாத்திரத்தை மிதமான சூட்டில் அடுப்பில் வைத்து அதில் பால் மற்றும் ஒரு டம்ளர் அளவு தண்ணீர் ஊற்றி அதை சுட வைக்கவும். (பாலில் ஆடை வராமல் இருப்பதற்கு அவ்வப்போது அதை கிண்டி கொண்டே இருக்கவும்.)

பால் நன்கு கொதித்து பொங்கி வரும் போது அடுப்பை முற்றிலுமாக குறைத்து விட்டு ஒரு கரண்டியின் மூலம் சுமார் 4 லிருந்து 6 நிமிடம் வரை அதை கிண்டி கொண்டே கொதிக்க விடவும்.

6 நிமிடத்திற்கு பிறகு அதில் நாம் அரைத்து வைத்திருக்கும் மாவை ஒவ்வொரு மேஜைக்கரண்டியாக சேர்த்து அதை நன்கு கலந்து விடவும்.

மாவை முற்றிலுமாக சேர்த்த பின் அதை மீண்டும் கிண்டி கொண்டே சுமார் 3 நிமிடம் வரை கொதிக்க விடவும்.

3 நிமிடத்திற்கு பிறகு அதில் பாதாம், பிஸ்தா, வெள்ளரி விதை, மற்றும் ஏலக்காய் தூளை சேர்த்து நன்கு கலந்து விட்டு அதை சுமார் ஒரு நிமிடம் வரை கொதிக்க விடவும்.

ஒரு நிமிடத்திற்கு பிறகு அடுப்பை அணைத்து விட்டு பாலை அடுப்பில் இருந்து கீழே இறக்கி அதை நன்கு ஆற விடவும்.

பால் நன்கு ஆறியவுடன் அதில் நாம் ஊற வைத்திருக்கும் சப்ஜா விதைகளை எடுத்து அதில் சேர்த்து அதை நன்கு கலந்து விடவும்.

அடுத்து அதில் அவரவர் விருப்பத்திற்கேற்ப ரோஸ் சிரப்பை சேர்த்து அதை நன்கு கலந்து விட்டு அதை பிரிட்ஜில் சுமார் 2 மணி நேரத்தில் இருந்து 3 மணி நேரம் வரை வைக்கவும்.

3 மணி நேரத்திற்கு பிறகு அதை பிரிட்ஜில் இருந்து வெளியே எடுத்து ஒரு டம்ளரில் ஊற்றி அதன் மேலே சிறிதளவு பிஸ்தாவை தூவி சில்லென்று பரிமாறவும்.

இப்பொழுது உங்கள் சுவையான மற்றும் சில்லென்று இருக்கும் ரோஸ் மில்க் சர்பத் தயார். இதை கட்டாயம் உங்கள் வீட்டில் செய்து பார்த்து உங்கள் குடும்பத்தாருடன் சேர்ந்து பருகி மகிழுங்கள்.